भान्सादेखि सडकसम्म विद्युतीय सामाग्रीको प्रयोग गरौँ : मन्त्री भुसाल


काठमाडौं : ऊर्जा जलस्रोत तथा सिँचाई मन्त्री पम्फा भुसालले विद्युतीय सामाग्रीको प्रयोग बढाउन नागरिकलाई आग्रह गरेकी छन् ।

विद्युतको बढी भन्दा बढी खपत गरी देशलाई अर्थतन्त्रमा बलियो बनाउने अभियान सुरु भएको भन्दै भान्सादेखि सडकसम्म विद्युतीय सामाग्रीको प्रयोगमा जोड दिन मन्त्री भुसालले सुझाव दिइन् ।

तनहुँको शुक्लागण्डकी नगरपालिका ५ बेलचौतारामा निर्माण भएको सोलार फार्म प्रालिले उत्पादन गरेको ५ मेगावाट सौर्य विद्युतको शुभारम्भ गर्दै मन्त्री भुसालले नेपालमा मिश्रित ऊर्जा प्रणालीले लगानी कर्ताहरूलाई उत्साहित बनाएको बताइन् ।

उनले जलविद्युतसँगै सोलार विद्युत् उत्पादनलाई सरकारले प्राथमिकता दिएको बताउँदै लगानीकर्ताहरूका लागि सहज वातावरण सिर्जना गर्ने बताइन् ।

उनले आगामी २ बर्ष भित्रमा देशभर विद्युतीकरण गर्ने लक्ष्य लिएको जानकारी दिँदै ऊर्जा क्षेत्रमा लगानी बढाउन लगानी कर्ताहरूलाई आग्रह समेत गरिन् ।

सोलार फार्मबाट उत्पादित विद्युत् मङ्गलवार नै राष्ट्रिय प्रसारण लाइनमा जडान गरिएको छ । स्वदेश तथा विदेशमा रहेका गैरआवसीयहरुको लगानी रहेको फार्म झण्डै ४३ करोडमा निर्माण सम्पन्न भएको फार्मका निर्देशक शंकरजंग गुरुङ्गले जानकारी दिए ।

नेपाल सरकारसँगै पहिलो पटक सौर्य ऊर्जा उत्पादनका लागी सम्झौता गरी निर्माण सुरु भएको यो आयोजना आगामी २५ वर्षका लागी १०० रोपनी जमिन भाडामा लिएर निर्माण गरिएको हो ।